जोराचा सुटतो अनील गगनी माती उडे सर्वही । |
मेघांची गरदी जमे त्वरित ती थेंबे पडू लागती ॥ |
ऊष्मा होत कमी बळेच थिजती ज्वाळा जणू त्या झळा । |
मातीला सुटला सुवास कसला विश्वातची आगळा ॥१॥ |
गाराही पडती सवे धरिवरि तारांगणे भासती । |
आडावेड कसे जलस्रवण ते सर्वांग ओथंबती ॥ |
कामातूर प्रिया तथा प्रियकरा विरहात हो चिंतिता । |
सृष्टी मात्र झणी आरोह भरते उन्मत्त हो मन्मथा ॥२॥ |
धाडाडम धडडम धडा धडधडा सौदामिनी गर्जते । |
मेघांच्या पटलावरी क्षण क्षणी प्रक्षुब्ध तेजाळते ॥ |
तृष्णाक्रांत चराचरावरि जले शिंपीत तो जातसे । |
जीवांना सुखवीतसा वळिव तो वरदानची होतसे ॥३॥ |
……. अभिनव |
मंगळवार, १७ एप्रिल, २०१२
वळवाचा पाऊस !
याची सदस्यत्व घ्या:
टिप्पणी पोस्ट करा (Atom)
कोणत्याही टिप्पण्या नाहीत:
टिप्पणी पोस्ट करा