शाळा सुरू...

जून महिना...पाऊस......शाळा सुरू... नवीन पुस्तके, नवीन गणवेष, नवीन उमेद ......

येता भरून नभ हे जल मेघयाने

होता सुरू झरझरा द्रव पावसाने

जाणोन मीही त्वरिता करि कार्य घेतो

शालेय वर्ष भरता नव वर्गही तो.   || १ ||

"बापूस" नित्य मजला करि कौतुकेही

साहित्य ते नवनवे आणितो त्वरेही

आनंद गंध घमता नव पुस्तकांचा

गणवेषही नविन तो चमके मुलांचा || २ ||

ती माय मजसि ममता देते शिदोरी

आईमधेच वसतो प्रभू चक्रधारी

ताता जननि उभयतां बहु कष्टताती

शिक्षीत मजसी करणे इति ध्येय हाती || ३ ||

शाळा तशीच आमुचि जननी द्वितीया

गुरुवर्य सर्व जन ते तरु-कल्प छाया

गंगौघ सम प्रवाही जणू ज्ञान गंगा

विद्या चिरंतन गमे धवला तरंगा || ४ ||

वंदून नित्य चरणी गुरु माय-ताते

वेचोन ज्ञान कण ते घेतो कराते

कीर्ती जगात करितो माझ्या कुळाची

सेवा करीत राही मम मायभूची || ५ ||

.................................अभिनव