झोप शांत आता बाळा |
बाप जोजवी आज तुला |
माझ्याजवळी नाहीत कवने |
ना अंगाई नाही गाणे |
हात मात्र पाठीवर ठेवूनि |
कवेत घेतो आज तुला |
तुला चुंबिता मला वाटते |
दाढी माझी तुला टोचते |
वळवळून तू त्रासिक हसशी |
गंमत वाटे फार मला |
आईसम तुज करणे ममता |
जमतच नाही मजसी करिता |
माया माझी परी अव्यक्ता |
कशी पटवू मी सोनफुला |
घरी तू येशी परी मी नसतो |
घरी येता तू निद्रित दिसतो |
रविवार परी तो आपुला असतो |
आणूया भरती आनंदाला |
तुझ्या सुखासाठी मी झटतो |
तुझ्याचसाठी राब-राबतो |
तू चुकता तुज रट्टे देतो |
वळ परी उठती मम हृदयाला |
आकांक्षांचे ओझे काही |
तुझ्यावरी मी लादत नाही |
स्वप्ने माझी परी पेरितो |
तुझ्या रूपाने उगवायाला |
..................................अभिनव |
मंगळवार, ३१ जुलै, २०१२
बापाची अंगाई.........!
याची सदस्यत्व घ्या:
टिप्पणी पोस्ट करा (Atom)
कोणत्याही टिप्पण्या नाहीत:
टिप्पणी पोस्ट करा